طوفانی بارشوں نےضلع خوشاب کے مختلف علاقوں میں تباہی مچائی

ملک کے دیگر حصوں کی طرح جہاں طوفانی بارشوں نے مختلف علاقوں میں تباہی مچائی ہے اسی طرح نواحی گاؤں سندرال میں بااثر افراد کی طرف سے بارشی پانی کے قدرتی راستوں کو روکنے کی وجہ سے نصف سے زائد شہر پانی میں ڈوب گیا ہے شہر کے سکولوں ‘ ہسپتالوں سمیت قبرستانوں سمیت لوگوں کے گھروں میں پانی کھڑا ہے اور اب بھی پانی گاؤں کی مختلف گلیوں میں تیزی سے آرہا ہے اور پانی کی سطح تیزی سے بلند ہورہی ہے جس کی وجہ سے گاؤں کے بڑے حصہ کے رہائشی مکمل طو رپر دیگر حصوں سے کٹ چکے ہیں اور مکمل طور پر گھروں میں محصور ہوکر رہ گئے ہیں اس وقت گاؤں میں پانی کی وجہ سے حالات یہ ہیں کہ مساجد کو جانے کے راستے پر بھی کئی کئی فٹ پانی کھڑا ہے مقامی شہریوں حاجی محمد اکرم ‘ حاجی اﷲ دتہ ‘ ملک اعجاز حسین ‘ ملک غلام جیلانی ‘ محمد فاروق اور عمر فاروق نے بتایا کہ گاؤں سندرال کی حاجی سلطی کالونی ‘ ہسپتال کالونی ‘ بلال کالونی اور پیر بخاری کالونی میں کئی کئی فٹ پانی کھڑا ہونے کی وجہ سے بااثر افراد نے پانی کی قدرتی گزر گاہوں کو بندکردیا ہے اور ریلوے لائن کے نیچے سے آنیوالے راستے بھی بند کردیے ہیں پانی کا کوئی نکاس نہیں اور نکاسی نہ ہونے کی وجہ سے پانی نے علاقہ کی زندگی کو مکمل طو رپر مفلوج کردیا ہے اہل علاقہ نے اس تمام تر صورتحال پر شدید احتجاج کیا ہے اور مقامی انتظامیہ سے مطالبہ کیا ہے کہ ان کے گاؤں سے پانی کی نکاسی کو یقینی بنانے کیلئے اقدامات اٹھائے جائیں